La Miyor Estrella

¿A qué non sabes, Mingo, cuál ye l 'estrella
qu'entre todes les otres non l ´hai como ella?
Anq'allongues, estires, hinches o estreches,
el diañu mi les quiebre, si mi l 'ateches.
Non la busques pel alba cuand ' alborea
el rellume del cielu sobre l 'aldea,
que con mil refocilos de lluz rosada
baxa de les arispies a la cañada.
Nin al finar el día cuando atapece
y mar y llume y sombra todo se mece
depicuando, spuliendo de les montañes
allá lonxe, per lonxe de les cabañes.
Nin pela media nuiche, naquella hora
en que durme la xente trabayaora
y anda cucia y de dedes y agazapáu
el lladrón, el granuxe y el desalmáu,
q'abeyen de les somes ena ñegrura
so crime, so cochellu, so catadura.
Non, Mingo: en tou el cielu no has ver aquella
que yo, pa min, barrunto miyor estrella.
Nin tará pela vera de la del Parru,
ni 'nte les utres siete que van en Carru;
ni'n senderu que cuerre l 'alma del moru
nin xunta del alerte güeyu del Toru;
nin andevo 'n denyure cabo' l Lluceru
nin alredior de la Guía del marineru.
¿Ves la de l´Abondanza con so refleyu
rellumante y gayosu com´un espeyu?
Pos anque sia tan guapa como aparenta
val más la mía, Mingo, pa la mio cuenta.
¿Ves, Mingo, la que-y llamen Melenona
que tien los pelos d´oru? Pos ye más bona
que todes les melenes y los melenos
la mió´strellina, Mingo, pa mín al menos.
¿ Ves al cau, la que-y llamen Diosa d´amores,
que s´axata con una faxa de flores;
que tevo un tiempu´n mundiu, y que cuasimente
tragó d´amor a todu bichu viviente,
y en cielu con sos dolces güeyos melgueros
fai xaregar los xuicios a los lluceros?
Pizcami l´embeligru, si n´todavía
non ti aparenta, Mingo, miyor la mía.
-Entoncies dimi cuala seya isa estrella
que n´ámbetu del cielu non l´hay com´ella....
-Ye.... l´estrellina
que lleva so la frente
la mio pollina.

- Pepín de Pría